ފަތުރުވެރިކަމުގެ ވިޔަފާރި އެސްޓަބްލިޝްމަންޓްތަކުން ނަގާ ގްރީން ޓެކްސް ބޮޑުކުރަން ސަރުކާރުން ނިންމި ނަމަވެސް އެކަމުގެ ސަބަބުން އާންމު ރައްޔިތު މީހާގެ ދިރިއުޅުމަށް އެއްވެސް ނޭދެވޭ އަސަރެއް ނުކުރާނެއެވެ.
މިހާރު ގްރީން ޓެކްސްގެ ގޮތުގައި ނަގަމުން ދަނީ ރިސޯޓްތަކާއި އިންޓްގްރޭޓެޑް ރިސޯޓްތަކާއި ޔޮޓް ސަފާރީތަކާއި ގެސްޓްހައުސްތަކާއި ރިސޯޓް ހޮޓާތަކާއި އެނޫންވެސް އެފަދަ ތަންތަނުގައި ފަތުރުވެރިން ހޭދަކުރާ ކޮންމެ ދުވަހަކަށް ބޮލަކަށް 6 ޑޮލަރެވެ.
ސަރުކާރުން ނިންމާފައި ވަނީ މި ކެޓަގަރީގައި ހިމެނޭ ތަންތަނުން މިހާރު ނަގަމުން އަންނަ 6 ޑޮލަރު، 12 ޑޮލަރަށް ބޮޑުކުރުމަށެވެ. އެއީ 100 އިންސައްތައިގެ ބޮޑުވުމެކެވެ.
މީހުން ދިރިއުޅޭ ރަށްރަށުގައި ހިންގާ ހޮޓާތަކާއި ގެސްޓްހައުސްތަކުގެ ތެރެއިން 50 ކޮޓަރި ނުވަތަ އެއަށްވުރެ މަދު އަދަދެއްގެ ކޮޓަރި ރަޖިސްޓަރީ ކޮށްފައިވާ ތަންތަނުން 3 ޑޮލަރު މިހާރު ނަގަމުން އަންނައިރު މި ކެޓަގަރީގައި ހިމެނޭ ތަންތަނުން ނަގާ ފީ 6 ޑޮލަރަށް ބޮޑުކުރަން ވަނީ ނިންމާފައެވެ.
މި ބަދަލަށް އަމަލުކުރަން ސަރުކާރުން ކަނޑައަޅާފައި ވަނީ އަންނަ އަހަރުގެ ޖަނަވަރީ މަހުގެ 1 ވަނަ ދުވަހުން ފެށިގެންނެވެ.