ބޭރު ފަސިންޖަރުން އަތުން ނަގާ ޑިޕާޗާ ޓެކްސް ބޮޑުކުރަނީ
ރާއްޖޭގެ އެއާޕޯޓްތަކުން ރާއްޖެއިން ބޭރަށް ފުރާ، ބޭރު ފަސިންޖަރުން އަތުން ނަގަމުން އަންނަ ޑިޕާޗާ ޓެކްސް ބޮޑުކުރަން ސަރުކާރުން ނިންމައިފިއެވެ.
މިހާރު އިކޮނޮމީ ކްލާހުން ދަތުރުކުރާ ބޭރު ފަސިންޖަރުން އަތުން ނަގަނީ 30 ޑޮލަރެވެ. މި އަހަރުގެ ޑިސެމްބަރ 1 ވަނަ ދުވަހުން ފެށިގެން އެ އަދަދު 50 ޑޮލަރަށް ބޮޑުކުރަން ސަރުކާރުން ވަނީ ނިންމާފައެވެ.
ބިޒްނަސް ކްލާހުގައި ދަތުރުކުރާ ދިވެހިންނާއި ބިދޭސީންގެ އަތުން މިހާރު ނަގަމުން އަންނަ 60 ޑޮލަރުގެ ބަދަލުގައި 120 ޑޮލަރު، އަދި ފަސްޓް ކްލާހުން ދަތުރުކުރާ ފަސިންޖަރުން އަތުން މިހާރު ނަގަމުން އަންނަ 90 ޑޮލަރުގެ ބަދަލުގައި 240 ޑޮލަރު، އަދި ޕްރައިވެޓް ޖެޓްގައި ދަތުރުކުރާ ފަސިންޖަރުންގެ އަތުން މިހާރު ނަގަމުން އަންނަ 120 ޑޮލަރުގެ ބަދަލުގައި 480 ޑޮލަރު ނަގަން ސަރުކާރުން ވަނީ ނިންމާފައެވެ.
ރާއްޖޭގެ އެއާޕޯޓްތަކުން ރާއްޖެއިން ބޭރަށް އިކޮނޮމީ ކުލާހުގައި ފުރާ ދިވެހިންގެ އަތުން ޑީޕާޗާ ފީގެ ގޮތުގައި މިހާރު ނަގަމުން ދަނީ 12 ޑޮލަރެވެ. އެ އަދަދަށް އެއްވެސް ބަދަލެއް ނުގެންނަން ސަރުކާރުން ވަނީ ނިންމާފައެވެ. އެހެންކަމުން މި ޓެކުހަށް ގެންނަ ބަދަލުގެ އަސަރެއް އާދައިގެ ރައްޔިތުންނަށް ނުފޯރާނެވެ.
ޓެކްސްތަކަށް ބަދަލު ގެންނަން ސަރުކާރުން ތައްޔާރުވަމުން އަންނައިރު ރައީސްގެ ވައުދާއި އެއްގޮތަށް އާންމު ރައްޔިތުން ދިރިއުޅުމަށް އަސަރުކުރާނެ އެއްވެސް ޓެކްސްއެއް ސަރުކާރުން ބޮޑެއް ނުކުރެއެވެ.
ބޭރު ފަސިންޖަރުންގެ އަތުން ނަގާ ޓެކްސްތައް ބޮޑުކުރަން ސަރުކާރުން ނިންމަނީ ދައުލަތަށް ލިބޭ ބޭރު ފައިސާގެ އާމްދަނީ އިތުރުކޮށް ކުރީ ސަރުކާރުތަކުން ނަގާފައިއޮތް ބޭރު ދަރަނި އަދާކުރުމަށް ކަމަށް ސަރުކާރުން ބުނެއެވެ. ސަރުކާރުން ވަނީ ޖީއެސްޓީ ރޭޓައް އެއްވެސް ބަދަލެއް ނުގެންނަން ނިންމާފައެވެ.