ޚާރިޖީ ވަޒީރު މޫސާ ޒަމީރު ވިދާޅުވީ ރާއްޖޭގެ ތަރައްގީގައި އިންޑިއާއަކީ މުހިންމު ބައިވެރިއެއް ކަމަށާއި މިހާތަނަށްވެސް އެކި ދާއިރާތަކުން އެ ޤައުމުގެ އެހީތެރިކަމާއި އެއްބާރުލުން ރާއްޖެއަށް ލިބިފައިވާ ކަމަށެވެ. އަދި އިޤްތިޞާދާއި ޓްރޭޑް އެންޑް އިންވެސްތްމަންޓުގެ ދާއިރާއާއި ތައުލީމާއި މީހުން ބިނާކުރުމާއި ޞިއްޙަތާއި ފަތުރުވެރިކަމާއި ކުޅިވަރާއި ދިފާޢީ ދާއިރާއާ ގުޅުންހުރި ކަންކަމާއި ދެ ޤައުމުގެ ދޭދޭގުޅުން އިތުރަށް ބަދަހިކުރުމަށް ގުޅިގެން މަސައްކަތްކުރުމާ ގުޅޭގޮތުން މަޝްވަރާ ކުރެވުނު ކަމަށް ވަޒީރު ވިދާޅުވިއެވެ.
ވަޒީރު ޒަމީރު ވަނީ އިންޑިއާއިން ރާއްޖޭގެ އެކި ދާއިރާތައް ތަރައްޤީކުރުމަށް އިންޑިއާއިން މެދުކެނޑުމެއް ނެތި ފޯރުކޮށްދެމުންދާ އެހީތެރިކަން ފާޅުކުރައްވާ ޝުކުރު އަދާކުރައްވައިފައެވެ. އަދި މި ބައްދަލުކުރެއްވުމުގައި ރާއްޖޭގެ ތަރައްގީގައި އިންޑިއާއިން އަބަދުވެސް އެއްބާރުލުން ދެއްވާނެކަމުގެ ޔަގީންކަން ދެއްވާކަމަށް ވިދާޅުވާ ވިދާޅުވުން އިންޑިއާގެ އެކްސްޓަރނަލް އެފެއާޒް މިނިސްޓަރުޖަޔަޝަންކަރު ވަނީ ތަކުރާރުކުރައްވާފައެވެ.
ޑރ ޖައިޝަންކަރުގެ މި ދަތުރުފުޅުގެ ސަބަބުން ރާއްޖެއާއި އިންޑިޔާއާ ދެޤައުމުގެ ދެމެދުގައި މިހާރަށްވުރެ ހަރުދަނާ އަދި ތަނަވަސް ޕާޓްނަރޝިޕެއް ޤާއިމުކުރުމަށް މަގުފަހިވެގެންދާނެ ކަމަށް ޤަބޫލުކުރްވާކަމަށް ޚާރިޖީ ވަޒީރު މޫސާ ޒަމީރު ވިދާޅުވިއެވެ. މި ބައްދަލުވުންތަކުގެ ނަތީޖާގެ ސަބަބުން އިޤްތިޞާދީ އެއްބާރުލުން އިތުރުވެ، ދިފާޢީ ދާއިރާއިން ގުޅުން ބަދަހިކުރުމަށް މަގު ފަހިވެ، ދުރު މުސްތަޤްބަލެއްގައި ދެޤައުމަށްވެސް ފައިދާކުރާނެކަމަށް ބެލެވޭކަމަށްވެސް ޚާރިޖީ ވަޒީރު ވިދާޅުވިއެވެ.
މީގެއިތުރުން މި ދަތުރުފުޅުގައި އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން ކުރިއަށްގެންދިޔަ ބައެއް މަޝްރޫޢުތަކުގެ ނިމުން ފާހަގަކުރުމާއި، އެކި ދާއިރާތަކުން ގާބިލިއްޔަތުކަން އިތުރުކުރުމަށް ދެ ޤައުމުގެ ދެމެދުގައި ފަހުމުނާމާތަކުގައި ސޮއިކުރެއްވުމަށްވެސް ވަނީ ހަމަޖެހިފައެވެ. އަދި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ މެނިފެސްޓޯގައި ހިމެނޭ ކްރިއޭޓަރ އިކޮނޮމީގެ އިޤްތިޞާދީ ތަރައްގީ އާއި ފުރުސަތުތައް ދިވެހިންނަށް ހޯދައިދިނުމާއި އީ-ކޮމަރސްގެ ދާއިރާ ތަރައްގީ ކުރުމަށްޓަކައި ރާއްޖޭން ފަހުމުނާމާއެއް ޤާއިމްކުރައްވާފައިވެއެވެ.
މިއީ އިންޑިއާގެ އެކްސްޓަރނަލް އެފެއަރޒް މިނިސްޓަރު ޑރ. ސުބްރަމާނިއަމް ޖަޔަޝަންކަރު ދެވަނަ ދައުރަކަށް މަގާމާ ހަވާލުވެވަޑައިގެންނެވުމަށްފަހު ރާއްޖެއަށް ކުރައްވާ ފުރަތަމަ ރަސްމީ ދަތުރުފުޅެވެ.