‎އެމްޑީޕީގެ ރައީސް އަބްދުﷲ ޝާހިދުގެ އަނބިކަނބަލުން ޒިފްލީނާ ފްލެޓް ގަތް މައްސަލާގައި ދަޢުވާކުރުމަށް ޕީޖީއަށް ފޮނުވަނީ

Picture of މުޙައްމަދު ޢަލީ

މުޙައްމަދު ޢަލީ

ކުރީ ސަރުކާރުގެ ޖެންޑަރ މިނިސްޓްރީގެ ސްޓޭޓް މިނިސްޓަރުކަން ކުރެއްވި ޒިފްލީނާ ހަސަން ހުޅުމާލޭގެ އެފްޑަބްލިއު ރެސިޑެންސް އިން 3.5 މިލިއަން ރުފިޔާއަށް ފްލެޓެއް ގަތް މައްސަލަ ތަހުޤީގު ކުރުމަށްފަހު ދަޢުވާކުރުމާމެދު ގޮތެއް ނިންމުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވުމަށް އޭސީސީން ނިންމައިފިއެވެ.

އޭސީސީގެ އިންފޮމޭޝަން އޮފިސަރ “ދިޔަރެސް” އަށް މަޢުލޫމާތުދެއްވަމުން ވިދާޅުވީ ޒިފްލީނާ ފްލެޓް ގަތް މުޢާމަލާތް އެކޮމިޝަނުން ތަހުޤީޤުކޮށްފައިވާކަމަށާއި ޕީޖީއަށް ފޮނުވަން ނިންމީ ދަޢުވާކުރުމާމެދު ގޮތެއް ނިންމުމަށް ކަމަށެވެ. އަދި މިމައްސަލައާ ބެހޭގޮތުން އިތުރު މަޢުލޫމާތު މިވަގުތައް ހާމަކުރެވެން ނެތް ކަމުގައިވެސް އޭސީސީގެ އޮފިޝަލް ވިދާޅުވިއެވެ.

ޒިފްލީނާގެ މައްޗަށް ނުޙައްގު މުއްސަނދިކަމެއްގައި ފްލެޓެއްގަތްކަމަށް ތުހުމަތު ކުރެވިފައިވާއިރު، ޒިފްލީނާ އޭނާގެ ދަރިފުޅުގެ ނަމުގައި ވެސް ހުޅުމާލެ އިން 3.8 މިލިއަން ރުފިޔާއަށް ފްލެޓެއް ގަނެފައިވާކަން ވަނީ ދާދިފަހުން ހާމަވެފައެވެ. ޒިފްލީނާގެ ދަރިފުޅު އައިޝަތު މިސްކްގެ ނަމުގައި ފްލެޓެއް ގަތީ އާރްސީސީ އިން ހުޅުމާލޭގައި ތަރައްގީ ކުރި ބްލޫ ހެވަން ރެސިޑެންސްއިންނެވެ. އަދި މިފްލެޓަށް ފައިސާ ދައްކާފައިވަނީ ޒިފްލީނާ ސްޓޭޓް މިނިސްޓަރުކަމުގައި ހުންނެވި ދުވަސްވަރުގައިކަންވެސް ވަނީ ހާމަވެފައެވެ.

ޒިފްލީނާއަކީ އެމްޑީޕީގެ ރައީސް އަބްދުﷲ ޝާހިދުގެ އަނބިކަނބަލުންނެވެ. މި ފްލެޓްތައް ގަތުމުގައި އަބްދުﷲ ޝާހިދުގެ ބައިވެރިވުމެއް ނުވަތަ މާލީ އެހީއެއް ޒިފްލީނާއަށް ލިބިފައިވާކަން އަދި ސާފުވެފައިނުވެއެވެ.