މޯލްޑިވިއަން ޑިމޮކްރަސީ ނެޓްވޯރކް (އެމް.ޑީ.އެން) އޭ ބުނުމުން އެއީ ކޮންބައެއްކަން ނޭނގޭ ދިވެއްސަކު މަދުވާނެއެވެ. އަޅުގަނޑުމެން އެންމެން ނުހަނު ލޯބިވާ އަޅުގަނޑުމެންގެ މާތް ރަސޫލާ އަށް އަދި މާތްވެގެންވާ އިސްލާމް ދީނަށް ފުރައްސާރަކޮށް ރިޕޯޓް ނެރުނު ޖަމްއިއްޔާއެވެ. ކުރީގެ ޕްރޮސެކިއުޓާ ޖެނެރަލް ހުސެއިން ޝަމީމް އާއި އެމްޑީއެން އާއި ގުޅުންތަކެއް ވާކަމަަށް މީގެ ކުރިންވެސް ވަނީ އަޑުފެތުރިފައެވެ. އެހެންނަމަވެސް ޝަމީމް އަކީ އެމްޑީއެންގައި ކިހާ ނުފޫޒުގަދަ މަގާމުތަކެއް ފުރުވާފައި ހުރި ބޭފުޅެއްކަމެއް މީގެ ކުރިން ތިލަވެފައެއް ނުވެއެވެ. މިއަދު “ދުވެލި އޮންލައިން” އިން ގެނެސްދޭނީ މިވާހަކައެވެ.
މޯލްޑިވިއަން ޑިމޮކްރަސީ ނެޓްވޯކް (އެމް.ޑީ.އެން) އެންމެ ފުރަތަމަ ހިންގަން ފަށާފައިވަނީ 2004 އޮގަސްޓު 12 އަދި 13 ވަނަ ދުވަހުގެ ހަރަކާތެއްގައި ގިނަ ޢަދަދެއްގެ މީހުން ހައްޔަރު ކުރުމާ ގުޅިގެން “މޯލްޑިވިއަން ޑިޓައިނީ ނެޓްވޯކުގެ” ނަމުގައެވެ. އެއަށްފަހު 2006 ވަނަ އަހަރު އެ ޖަމިއްޔާ، ރާއްޖޭގައި އިންސާނީ ޙައްގުތައް ހިމާޔަތް ކުރުމަށް ގޮވާލާއި ޖަމިއްޔާ އެއްގެ ގޮތުގައި ރަޖިސްޓަރކޮށްފައިވެއެވެ. އަދި، 2010 ވަނަ އަހަރު، ޖަމިއްޔާގެ ނަން، މޯލްޑިވިއަން ޑިމޮކްރަސީ ނެޓްވޯކް (އެމް.ޑީ.އެން) އަށް ބަދަލުކޮށް، އެ ޖަމިއްޔާ އަކީ އިންސާނީ ހައްގުތައް ހިމާޔަތް ކުރުމާއި ޑިމޮކްރެސީގެ އާދަތައް ހަރުދަނާކުރުމުގެ ގޮތުން އުފައްދާފައިވާ ޖަމިއްޔާއެއްގެ ގޮތުގައި ރަޖިސްޓަރކޮށްފައިވެއެވެ.
އެމް.ޑީ.އެން އަކީ، އެމް.ޑީ.ޕީގެ އިސް ބައެއް ފަރާތްތަކާއި ގުޅުން އޮންނަ ފަރާތްތަކެއް އިސްވެ، ހިންގަމުން ދިޔަ ޖަމިއްޔާ އެއް ކަމަށްވާއިރު، އެ ޖަމިއްޔާ އިން، އެމް.ޑީ.ޕީގެ ސިޔާސީ ހަރަކާތްތަކުގައި ހައްޔަރުކުރާ މީހުން ދިފާޢުކޮށް، އެ ފަރާތްތަކުގެ ޙައްޤުގައި ރިޕޯޓުތަކެއް ނެރެފައިވާ ކަން ފާހަގަ ކުރެވެއެވެ. އަދި، 2015 ވަނަ އަހަރު، އެ ޖަމިއްޔާ އިން “ޕްރިލިމިނަރީ އެސެސްމެންޓް އޮން ރޭޑިކަލައިޒޭޝަން އިން މޯލްޑިވްސް”ގެ ނަމުގައި ރިޕޯޓެއް ޢާއްމުކޮށްފައިވެއެވެ. އެ ރިޕޯޓަކީ އިސްލާމްދީނަށް ވަރަށް ބޮޑަށް ފުރައްސާރަކޮށް، އިސްލާމްދީނުގެ އުސޫލުތަކަށް ފާޑު ކިޔައި ނެރެފައިވާ ރިޕޯޓެއް ކަމަށްވީ ނަމަވެސް، އެ ދުވަސްވަރު، އެ ރިޕޯޓު ޢާއްމުންގެ ގިނަ ފަރާތްތަކާ ހަމައަށް ފޯރާފައިނުވާތީ، ގިނަ ދިވެހިންނަށް އެ ދުވަސްވަރު އެ ރިޕޯޓުގެ މަޢުލޫމާތު އެނގިފައިނުވެއެވެ. ނަމަވެސް، އެމް.ޑީ.ޕީގެ ސަރުކާރެއް އުފެދުމާއެކު، އެ ޖަމިއްޔާއިން 2019 ވަނަ އަހަރު އެ ރިޕޯޓު އަލުން ޢާއްމުކުރުމާއެކު، ގިނަ ފަރާތްތަކަށް އެ ރިޕޯޓުގެ މަޢުލޫމާތު އެނގި، އެ ޖަމިއްޔާ އާ މެދު ފިޔަވަޅު އެޅުމަށް ގޮވާލައި މުޒާހަރާ ކޮށްފައިވެއެވެ. އެކަމުގެ ސަބަބުން، ސަރުކާރުން 2019 ވަނަ އަހަރު ޑިސެންބަރު މަހުގެ ތެރޭގައި އެ ޖަމިއްޔާ އުވާލުމަށް ނިންމައި އެކަން ސަރުކާރުން އިޢުލާން ކުރި ނަމަވެސް އެ ޖަމްޢިއްޔާގެ ހަރަކާތްތައް ކުރިއަށް ގެންގޮސްފައިވާކަން ފާހަގަކުރެވެއެވެ.
ޙުސައިން ޝަމީމުގެ ކުރީގެ އަންހެނުން ކ. މާލެ / މއ. ބޯގަންވިލާ ޝަހިންދާ އިސްމާޢިލް އަކީ އެ ޖަމިއްޔާގައި އެންމެ އިސްކޮށް ހަރަކާތްތެރިވި ފަރާތް ކަމަށް ފާހަގަ ކުރެވޭއިރު، އެމް.ޑީ.އެން އިން ވަނީ، ޙުސައިން ޝަމީމު 2007 – 2009 އަދި 2013 – 2016 ވަނަ އަހަރަށް އެ ޖަމިއްޔާގެ ޗެއަރޕާސަން ކަމުގެ މަގާމު އަދާކޮށްފައިވާ ކަން ހާމަކޮށްފައިވެއެވެ. އެހެންކަމުން، 2015 ވަނަ އަހަރު އެމް.ޑީ.އެންގެ ރިޕޯޓު ޢާއްމު ކުރިއިރު، އެ ޖަމިއްޔާގެ ޗެއަރޕާސަން ކަމުގެ މަގާމުގައި ހުރި ކަމަށް ބެލެވެނީ ޙުސައިން ޝަމީމުއެވެ. މިކަން އެމްޑީއެންއިންވެސް ވަނީ ކަށަވަރުކޮއްދީފައެވެ.
އިސްލާމީ ގައުމެއްގެ އިސްލާމީ ޝަރީއަތާ ގާނޫނުތައް ނަގަހައްޓާ ދަމަހައްޓަން ކޮނޑުގައި ޒިންމާ އަޅާގެން މިފަދަ އިސްލާމްދީނާ ބީރައްޓެހި “ލާދީނީ” ކަންކަން ކޮށްފައިވާ ޖަމްއިއްޔާއެއްގެ ފައުންޑަރެއް އަދި ކުރިން އެތަނުގެ ޗެއާޕާސްންކަން ދެފަރެއްގެ މަތީން ކޮށްފައިވާ މީހަކު ހުންނާކަށް ހަމަގައިމުވެސް ދިވެހި ރައްޔިތުން ބޭނުމެއް ނުވާނެއެވެ. އިސްލާމް ދީން ދެކެ ލޯބިވާ މީހަކު ބޭނުމެއް ނުވާނެއެވެ. ހަމަގައިމުވެސް އެމަގާމުން ޝަމީމް ވަކިކުރަން ނިންމުން އަދި އޭނާ އެމަގާމުން އިސްތިއުފާދިނުން ވެގެންދާނީ އެތަށް ބަޔަކު އިންތިޒާރުކުރި ދުވަހަކަށެވެ.
އެމްޑީއެންއާއި ގުޅުން އޮތުމުގެ އިތުރަށް ޝަމީމު، ޕްރޮސެކިއުޓަރ ޖެނެރަލްކަމުގެ މަގާމުގައި ހުރިއިރު، ބައެއް މައްސަލަތަކުގައި ފައިސާ ހުށަހެޅުމުން، ފައިސާ ހުށަހަޅާ ފަރާތުން އެދޭ ގޮތަށް ނިންމާދިނުމަށް ޝަމީމު އެއްބަސްވެފައި އެބަހުރިކަން އެނގެން އެބަހުއްޓެވެ. އެކަމާ ގުޅޭ ރިޕޯޓެއް ދުވެހި އޮންލައިން އިން މީގެ ކުރިން ވާނީ ޝާއިއުކޮށްފައެވެ.