މި ކުޑަކުޑަ ދިވެހިރާއްޖެއަކީ ސައްތައިން ސައްތަ އިސްލާމީ ގައުމެކެވެ. އިސްލާމް ދީނުގައި، މުސްލިމުންގެ މައްޗަށް ވެރިކަން ކުރުމަށް، ރައްޔިތުންގެ ފުރިހަމަ ތާއީދާއިއެކު ހޮވޭ ވެރިއެއަކަށް އެ މުޖުތަމައެއްގައި އެންމެ ފުރިހަމައަށް އިހުތިރާމް ކުރުމާއި ގަދަރު ކުރުމަކީ އަޅުގަނޑުމެންގެ ތަބާވެގެންތިބި އިސްލާމް ދީން ވެސް ދައްކުވައި ދީފައިވާ މަގެވެ. އަދި އަޅުގަނޑުމެންގެ ސަގާފަތަކީ ވެސް އެއީއެވެ.
ނަމަވެސް މި ގައުމުގެ ހާލަތު ބުނެދިނުމުގައި އެންމެ އިސް ދައުރެއް އަދާކުރަމުން އަންނަ ނޫސްވެރިކަމުގެ ތެރޭގައި، މުޖުތަމައު ފަސާދަ ކޮށްލަނިވި އެތައްކަމެއް މުޖުތަމައުގެ އާންމު މިންގަނޑަށް ނުފެތޭހާވެސް މުޑުދާރުކޮށް ފަތުރާ ނޫސް މަޖައްލާތައް އެބަހުއްޓެވެ.
ރަޖިސްޓަރީ ކުރެވި ގާނޫނީ ހައިސިއްޔަތު ލިބިފައިވާ ބައެއް ނޫސްތަކުން އަޅުގަނޑުމެންގެ ވެރީންގެ އަބުރަށް ހުތުރުވާ ސިފަތަކަށް ކާޓޫން ކުރަހައި ދޮގު ހަބަރުތައް ފަތުރަނީ އިމެއް ނެތިއެވެ.
މިފަދަ އަމަލުތަކަކީ ނޫސްވެރިކަމަށް ވެސް އޮތް ހުތުރަކަށް ވާއިރު، އެފަދައިން އަމަލުކުރާ ނޫސްތަކާއި މެދު ގާނޫނީ ފިޔަވަޅު އެޅުމަކީ ކަމާއި ބެހޭ ފަރާތްތަކުގެ ޒިންމާއެކެވެ. ނޫންނަމް މުޖުތަމައުގެ ހަމަޖެހުން ގެއްލި ފަސާދަވުން އޮތީ ދުރެއްގައި ނޫނެވެ.