ރާއްޖެ ޓީވީން ގެނެސްދޭ “ފަށާއިރު” ޕްރޮގްރާމުގައި ތެދު ހެދުމުން އެ ޗެނަލްގެ ސީނިއާ ވީޑިއޯ ޖާނަލިސްޓް ލައިސާ އަހްމަދު ޒަކީގެ ވަޒީފާ ގެއްލިއްޖެއެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިދިޔަ މަހު އދ އާންމު މަޖިލީހުގެ 79 ވަނަ ސެޝަންގައި ބައިވެރިވެ ވަޑައިގަތުމަށް އެމެރިކާއަށް ކުރެއްވި ދަތުރުފުޅުގެ ތެރެއިން އދ ސަލާމަތީ މަޖިލީހުގައި ތަގުރީރު ކުރެއްވިއެވެ. އެއީ މީގެ 59 އަހަރު ކުރިން، އދ.ގެ މެންބަރަކަށް ދިވެހިރާއްޖެ ވީ ފަހުން، ދިވެހިރާއްޖޭގެ ރައީސްގެ މަގާމުގައި ހުންނެވި ބޭފުޅަކު، އދ.ގެ ސަލާމަތީ މަޖިލީހުގައި ތަގުރީރު ކުރެއްވި ފުރަތަމަ ފަހަރެވެ.
ދިވެހިރާއްޖޭގެ ރައީސަކު އަލަށް އދ ގެ ސެކިއުރިޓީ ކައުންސިލުގައި ތަގުރީރު ކުރެއްވުމަކީ ހުރިހާ ދިވެހީން ވެސް ފަހުރުވެރިވުން ހައްގު ކަމެއްކަމަށް ރާއްޖެ ޓީވީން ގެނެސްދިން “ފަށާއިރު” ޕްރޮގްރާމުގައި ބުނުމުން، އެ ޕްރޮގްރާމް ހުށަހަޅައިދޭން ދެން އިން ޕްރެސެންޓަރ އާމިރު، އެއީ ރާއްޖޭގެ ރައްޔިތުން ފަހުރުވެރިވާން ޖެހޭ ކަމެއްތޯ ބުނެ ސުވާލު އުފައްދައެވެ. އަދި އެއީ ފަހުރެއް ނޫން ކަމަށް ވެސް ބުނެއެވެ.
މި ޕްރޮގްރާމްގައި އަމިއްލަ ހިޔާލަށް ލައި ދެއްކި ވާހަކަ ތަކުގެ ސަބަބުން، ރާއްޖެ ޓީވީގައި އެ މައްސަލަ ބޮޑުވެ މިހާރު އޭނާއަށް ވަނީ އެ ވަޒީފާ ގެއްލިފައެވެ.
ވަޒީފާއިން ވަކިވކަން ހާމަކޮށް އޭނާ ސޯޝަލް މީޑިއާގައި ވަނީ ދިގު ޕޯސްޓެއް ޖަހާފައެވެ. އެ ޕޯސްޓްގައި އޭނާ ބުނެފައިވަނީ ނޫސްވެރިއަކަށް ވުމަކީ އަބަދުވެސް ދެކުނު ހުވަފެނެކޭ ނުބުނާނަން ކަމަށާއި ސަބަބަކީ ނޫސްވެރިކަން ކުރެވޭ ވަރަށްވުރެ “ފިނޑި” ކަމަށް އަމިއްލައަށް އަބަދުވެސް ގަބޫލު ކުރެވިފައި އޮތުން ކަމަށެވެ.
ލައި އިތުރަށް ބުނީ “ފިނޑިކަމާއެކުވެސް” ދާއިރާއަށް ވަދެ، ނޫސްވެރިކަމުގެ 6 ވަނަ އަހަރު ނިމި 7 ވަނަ އަހަރު ފަށަންދާއިރު، ވޭތުވެ ދިޔަ އަހަރުތަކަކީ ވަރަށް ގިނަ ތަޖުރިބާތަކާއި ފިލާވަޅުތަކެއް ލިބުނު އަހަރުތަކެއް ކަމަށެވެ.
ފާއިތުވި އަހަރުތަކުގައި ނޫސްވެރިކަމުގެ ދާއިރާއިން ލިބުނު އެންމެ މުހިއްމު ފިލާވަޅަކީ ކޮބައިތޯ މީހަކު އަހައިފިނަމަ ބުނެވެން އޮތީ ކޮންމެ ދާއިރާއެއްގައި ވެސް، އަދި ވަކިން ހާއްސަކޮށް ނޫސްވެރިކަމުގައި ތިމާ އަމިއްލައަށް ވެސް ގަބޫލު ކުރާ ހަމަތަކާއި، މިންގަނޑުތަކެއް އަބަދުވެސް ބަހައްޓަންޖެހޭނެ ކަމަށާއި އަދި ދައްކާ ވާހަކަ ނުވަތަ އާންމުންނަށް ދޫކޮށްލާ ލިއުމަކީ ތިމާގެ ފުރިހަމަ އިހުތިޔާރާއި، ވިސްނުމާއި، ގަބޫލު ކުރުމާއެކު ދޫކޮށްލާ އެއްޗަކަށްވުމުގެ މުހިންމު ކަމަށް ލައިސާ ބުނެފައިވެއެވެ.
އޭނާ އިތުރަށް ބުނީ ތިމާގެ ދުލުން ބޭރުވާ ކޮންމެ ބަހަކީ ބަހާ އަމަލުން އެ ބަހަކަށް ތިމާގެ އަމިއްލަ ނަފްސުވެސް އެއްބަސްވާ ބަހަކަށްވާންޖެހޭނެ ކަމަށާއި މި ނޫނަސް މުހިއްމު އެތައް ފިލާވަޅުތަކާއި، ކުރިއަށް ދިއުމުގައި ވިސްނަން ޖެހޭ ވަރަށް ގިނަ ކަންކަން ދަސްވެއްޖެ ކަމަށާއި އަދި ދަސްކުރަން ޖެހޭ ބައިވަރު ކަންކަން ވެސް އެބަހުރި ކަމަށެވެ.
ފާއިތުވި ހައަހަރުތެރޭ އެންމެ އުފާވާ ކަމަކީ ކޮބައިތޯ މީހަކު އަހައިފިނަމަ ބުނެވެން އޮތީ އަމިއްލަ ނަފްސަށް ކުރި ވަރަށް ގިނަ “ޗެލެންޖުތަކެއް” ކާމިޔާބު ކުރެވުނު ކަމަށާއި އޭގެ އެއް ކަމަކީ އޮފީހުގެ ހާޒިރީގައި މިދިޔަ އަހަރެކޭ އެއްގޮތަށް މިއަހަރު ވެސް އަހަރުގެ އެންމެ ދުވަހަކުވެސް މިނެޓެއްވެސް ގަޑި ނުޖެހި އަހަރު ނިންމާލެވޭތީ ލިބޭ އުފާވެރިކަން ކަމުގައި އޭނާ ބުންޏެވެ.
އޭނާ އިތުރަށް ބުނީ އަމިއްލަ ނަފްސާމެދު އަބަދުވެސް ގަބޫލު ކުރެވުނު “ފިނޑި” ، “ނުކެރޭ” މީހެއްކަމުގެ ވިސްނުން ދޫކޮށްލެވުނު ކަމަށާއި، ދާއިރާގައި އެންމެ ކުރާހިތްވާ މަސައްކަތަކީ ކޮބައިތޯ މީހަކު އަހައިފިނަމަ ބުނެވެން އޮތީ، ކޯޓުތަކުގައި ހިނގާ މައްސަލަތަކާއި ޝަރީއަތްތައް ކަވަރ ކުރުން ކަމަށެވެ.
އުފާވެރި، ހިތާމަވެރި އަހަރުތަކަކަށްފަހު އަނެއްކާވެސް އައު ފެށުމަކުން ފަށަން ވިސްނަމުންދާއިރު، މި ދާއިރާއިން ކުރިއަށް ދިއުމަށް ހިތްވަރުދީ އަދި މިހާރު ވެސް ދެމުންދާ އެންމެންނަށް ވަރަށް ހާއްސަ ޝުކުރެއް އޭނާ ވަނީ އަދާކޮށްފައެވެ.
ރާއްޖެ ޓީވީން ލައިއާއި މެދު ކަންކުރި ގޮތުން ސޯޝަލް މީޑިއާގައި ވެސް ވަނީ ގިނަބަޔަކު ފާޑު ކިޔާފައެވެ. ސޯޝަލް މީޑިއާގައި ހިޔާލުފާޅު ކުރި މީހަކު ބުނީ ސާފު ޑިމޮކްރަސީއަށް ފައްކާވެފައި އޮތްކަމަށް ބަޔަކު ދެކޭ އެމްޑީޕީގެ ޓީވީ ޗެނަލް ކަމަށްވާ “ރާއްޖެ ޓީވީ” ހާލަތަކީ މިއީ ކަމަށާއި، ޓީވީގައި ކިޔަން ޖެހެނީ ތަނުގެ ވެރިންގެ ހިތް ރުހޭ ވާހަކަ ކަމަށެވެ. އަމިއްލަ ހިޔާލަށާއި ތެދު ބުނުމަށް ނޫސްވެރިޔާއަށް ފުރުސަތު ނެތް ކަމަށެވެ.